業績期觀察 - 三

繼續睇業績:

金茂SS
業績過關, 上海深圳啲酒店好高增長，北京三亞反而正正常常，非呢幾個地點就普通。寫字樓亦過關, 跟通漲升租金應問題不大。

2017年用完補貼，現價應已price in 呢個因素，變返一隻好穩定既4厘幾收租股。不過我喺
$4邊買, 袋住5厘先。

其實可以轉過去reit 更高息，但持倉裏有一隻上海深圳酒店餐飲相關的股票亦不錯，每年高單位數業績及派息增長亦可預期。袋住先，睇睇之後有咩變化再作打算。

周黑鴨
慘, 銷售成本大增, 競爭極為激烈，周轉天數上升，狂開店都係得純利6%增長......睇黎天氣不似預期......

黎緊新產品有小龍蝦，加埋手頭上仲有成30億現金，睇下同業互相割喉之下邊間死先，再觀察下間公司會點行。列入壯士斷臂清單。

富力地產
市場焦點當然係收購萬達酒店資產，可惜呢部份除左賬面賺錢外，充其量只能夠為原先酒店組合止止血，今年酒店組合唔洗輸錢了。下年估計可以有雞碎咁多既盈利添。收租黎講，最重要都係辦公嗰5億純利。

賣樓方面，管理層預測下年協議銷售有1300億，計返上年個比例，協議銷售轉化為營業額得7成，執行力弱又要打9折, 加埋今年市道似乎弱啲又要打9折，我估下年賣樓營業額740億左右，都會有38%增長。15% net profit margin, 大約下年可賺111億, 加埋酒店辦公室大約120億。

股息今年派35億，下年派40億問題不大，派到盡有機會48億添，現價息7%, 下年8%。一間200億市值公司，每年賣樓坐底賺50億，2017年賣樓賺80億，2018估可賺120億...

內房入面中小企(500億樓下=_=)都比較低估，可能預期租售並舉，房地產調控會影響否則不明白點解市場咁低估。

嘉士利
一個好爛既餅乾市場, 入面一家無咩增長既公司, 生意穩定，餅乾食唔死人，現價派到每年8厘息。好適合我做套息股。

李寧
業績明蝕實賺，核心盈利增長差不多100%... 大家可睇睇李寧紐約時裝展，的確係無以前咁老土，可能可以殺出一條血路，暫時當中國nike 持有。

最近覺得好奇怪, 大家重講緊網購影響Fashion 品牌, 零售做唔起。但愈來愈多間服裝零售交出亮麗業績。我估市場好快會講邊啲已適應新零售時代，李寧應係其中一間。

*****

沽期指方面，星期三30030沽左第三張期。晚上走左去玩，返屋企見到夜期升返曬 T_T 原本29100 附近想走啲位，夜晚睇到時已係29800左右, 欲哭無淚，同朋友「gathering」 一陣原來咁貴。

呢個亦係沽期唔好處，太困身。

之前講過200-400點唔會食，但3張期加埋食接近4千點，已初步達到預期目標，應該要平少少倉抬錢走再等機會。

既然食唔到, 惟有阿Q精神再睇下恒指點走啦，我唔認為上得返30500。但中間反覆, 第三張期指係有危險的。