再見了2018年第一季

時日怱怱，咁快到三月底。

股市
恒指連續兩個月陰燭，我認為牛3鐵定已經完結，之後進入有反彈無突破的時段。已在30880 沽左第二張期指。第一張之前捱左成半個月價，呢一個星期就返返曬黎，就睇下四月恒指會跌到去邊。

完全估唔到危機係邊個位。貿戰似係表面原因而已，似乎係美息升既後遺症慢慢浮現。

業績期觀察系列下篇再繼續寫。

樓市
香港:
岩岩CCL 又升0.5%, 大型單位仲要升左4.8%...... 我係既得利益者都想講句係咪痴左線。供應唔似會急劇增加，利息唔似會急升(每年升0.5% 大家都承受到)，需求唔似會緩和，因為太多需求係前幾年一路積落黎，睇黎真係要有外星人攻擊香港先打得冧樓市。

仍然係嗰句，自住剛需點都要買。投資計過數3%樓下就咪搞我了，槓杆埋先得6%，水位對我黎講唔太夠。

日本:
攞曬太太批準，下季等股市塵埃落定埋就向世界出發了! 如果萬一股市崩盤，香港樓市中埋招咁會再作打算，始終日本樓唔係必要的投資物。

日元猛咁升，唔知咩世界，加息美元港元跌... R曬頭。

虎門:
最近大陸樓市嚴控下麻麻地，慢慢等緊第三季高鐵開通，下年年中虎門二橋開通。依家收住租無咩特別。不過人仔急升係意想不到的回報。借港紙收人仔，無心插柳既完美操作。有啲運仔。

小孩
咁快半歲大，識坐識翻身好過癮。煩緊夜晚要同佢講咩故仔。經濟等係我強項，睇小說漫畫等係我興趣，但一講到兒童讀物就想瞓著........ 點算?

掘礦
應該係經歷緊汰弱留強既階段，陸續會有礦場頂唔順執笠，然後自然地難度下降，令回報去返一個合理水平。繼續等待礦場執笠既新聞。策略不變，一路掘礦，一路低位買點btc，控制好注碼。

業績期觀察 - 二

又寫返幾句沽期，恒指今朝上破31798，非常令我驚訝，今早平左淡倉，沽期行動以失敗告終，成個行動輸左800點。輸錢當然唔高興, 不過我唔後悔今次沽期行動。

今次我覺得係非常大機會爆發股災，而要贏到足以改變人生既財富亦係不可多得既機會，用1萬蚊搏呢個機會, 我覺得值。但人算不如天算，都無辦法。

收息倉90%持股, 呢1萬蚊就當係幫收息倉做hedging, 咁諗可能會舒服啲, 阿Q精神, 哈哈

不過恒指未脫離危險期，個人會喺32400 再開4月淡倉一次，如果真係會到的話。

收息倉仍然不變90%持股。炒倉日內會加返到50-60%左右。

***尾市開返淡倉, 希望唔好左一巴右一巴... 打到變豬頭...

SOHO
SOHO 的業績好多人諗得太複雜。其實就係收租純利12億。下年下下年應會自動分配每年10%增長咁增加租金收入。

佢模擬REIT 咁派8成都係每年每股派RMB0.192左右，換返港紙0.236, 5%計SOHO 值4.7, 6%計值3.9。現價PB 0.6。高價買SOHO的比佢年年賣樓特別息養大左個胃口/坤左，但實際$4左右的SOHO 作為收息股還是很不錯的。

只要佢唔係今天開始玩財技, 變身OT 一路唔派息向下炒就可以了。

上半年其實共派左差不多1蚊, 今天對於口袋裏得30-40億既SOHO 黎講已係石頭爆不出血了，除非繼續賣產啦。但其實我覺得賣夠了, 連剩下的核心資產都賣的話我真係要賣出410。

加返未來幾年預測, 分拆coworking space, 繼續起野賣野, 順道提升租值。可能3年有1年有特別息, 其餘有5厘幾, 之後變成純REIT 模式。

川河
川河同SOHO情況有點相似, 其實已將所賺全數派出。湯臣派息嗰部份好少有現金真正落袋，本身湯臣財政都麻麻, 以股代息對雙方都是好事。派每股0.045現價有7.5厘, 派息望落要持續不難。0.6我加左啲川河。

未來繼續現有模式, 直至湯臣有餘錢...... 或者會比現金買湯臣啲野, 或者出錢發展澳門地，比較難估，但大機會派息不穩定，如果低過6厘的確可換馬。

Prada 廠
廠佬轉型做零售通常沒有好結果, 以前既聯亞仍瀝瀝在目。暫時時代既零售純利佔比10%左右，存貨周轉正常，擴張亦唔算太急速，睇下會唔會成為我見証既第一間成功轉型既廠家。

半年純利1.45億, 全年可達2.9億。暫時一年派息0.12, 大約1.2億，現金維持喺5.4億，即無咩能力加大派息了，好難返到以往高峰每年賺5億派2.5億既日子了。

現價PE 6, 息率7%, 不高不低，正常。密切睇實幾個零售品牌發展，如發生重估咁就唔同講法。

未來零售應繼續有增長, 過幾年去到佔比30%左右, 成盤生意去返正常共賺4億派2億, 極限價值應在$3.5左右。如果零售PK左就後話。

PS 未來嗰啲純粹係諗下, 但有必要估, 因為買公司係想同佢一齊成長, 如果隻pokemon 成長路線同你諗既唔同, 就唔洗特別養佢了。

屈機美斯 vs 極限C朗 的得著

由2005年睇住美斯第一場西甲接應朗拿甸奴挑傳, 然後好似好輕鬆咁笠過龍門(2次)開始, 今年已經第13年睇佢踢波。

基本上, 佢唔係人。未退役，已將所有足球界紀錄推前一大截。呢種破紀錄, 如果用跑步黎比喻，就係突然將WR 由9.58秒推前到9秒咁恐怖。

尋晚，60分鐘內射穿高爾圖斯大細龍2次，睇到 O 曬咀。正如享利所說，如果美斯想的話 (呢度要加埋體力足夠)，佢可以過曬你全隊然後得分。屈機。

今年，真心希望美斯可以帶領阿根廷奪得世界杯，令我地呢代人出一個實至名歸既球王。

另一邊既C朗，我亦極為欣賞。強壯，勤力，快，射術好，騰空強。C朗係人，但佢演繹左點樣先可以追近同「不是人」的距離，就係不懈既努力，永遠既鬥心，無窮既信心，嘗試超越極限。

有邊個諗到C朗可以追到同美斯一樣數量的金球獎, 另外重要加個歐國杯?

面對困難時，應該要學習C朗的態度，就算波底麻麻，年齡開始大，都憑住生日都做gym 既鬥心對抗歲月的殘酷, 以及美斯呢個外星人。大家有冇嘗試稍為推前自己極限?

2位絶代雙驕，另一樣野值得我地學習係，假想敵。講真，無C朗, 美斯既天份未必可以挖掘到咁盡。無美斯，C朗更加一早就去玩下女人算了。有假想敵互相砥礪，互相進步，絶對係一生最重要既事。

如果你發現已超越現階段既假想敵，生活變得平淡，請儘快揾出下一階段的假想敵。當然啦, 如果承受到, 假想敵可以係Steve jobs, 巴菲特，正常情況下大家諗都唔敢諗 XD...

美斯 VS C朗，今年好可能係整套劇既最終幕了，感謝這個時代有佢地2位，且看且珍惜。

PS 叉開一句，之前傑志盧均宜亞冠輸後講左句: 「雖然輸了6球，但我們預了輸，我們輸得起，這是好事。」雖然有點斷章取意，但實在un 耳，就算99%會輸，運動員都要諗辦法贏，唔好教壞細路。

業績期觀察

先講少少沽期指現況, 30880開倉, 殺到29800都無平倉, 跟住比29800->31700反彈搞到亂曬龍。捱價中，中間進進出出輸緊大約500點。但牛3大機會已完睇法暫時未變。

業績期股講少少:
1. 港鐵 - 好多人以為港鐵係賺車票或者上蓋商場, 但其實港鐵既站內商鋪先係金礦......有興趣大家去睇下究竟細細間7-11或者美心係幾咁賺錢。不過仍然係嗰句, 港鐵有特別息就好玩, 依家貴夾無息, 唔好搞我。

2. 國泰 - 岩岩睇完，2017年下半年賺7億，好過我預期了。2019就完燃油對沖, 國泰應該可以返返正軌。不望爆升, 香港品牌, 重新振作就好了。說來太古應該少左個業務拖後腿, 亦係見底回升階段了吧?

3. 610 惠記 - 受惠路勁強勁增長，增派息，無得輸。買入價黎講岩岩好10厘股了，很是滿意。如果升過$5.5, 又唔見路勁再有咩突破, 開始要諗食糊問題了。路勁已沽清全部換成610。組合第二大收息股。

4. 新地 - 好可怕, 呢間公司收租物業部份好恐佈。每年170億淨租金收入，以4%計，呢部份4200億市值，5%計值3400億。賣樓部份基本係送的。負債10%, 仲低過你同我。大跌市時都唔洗點諗, 息率如果去到5%, 成副身家撲落去。

5. 滙賢 - 今年業績全面反映營改增的影響，以及奇怪的房租稅撥備影響北京東方廣場收入，但整體來說每基金分派金額只微跌2.7%, 反映滙賢管理層既手段。

新買2間酒店短期內仍當係同阿媽買垃圾, 但長期黎講大陸酒店營運回報應會提高, 到時再慢慢還債。估計黎緊2年滙賢只會維持等同於無的增長, 但現價仍有8.1%, 加埋人仔升值，分散少少港元弱勢風險。仍然係組合中鐵打主力。

6. MGCC - 1月出左3Q數, 一切如常, 惟一唔好就係股價升太快, 變成得6%。又一城受惠香港零售復甦，Gateway plaza 北京寫字樓供不應求，不過黎緊國貿有大項目可能會拖低租金一陣。最差係上海business park 了，但持平應該不難。MGCC 黎緊可能在日本會有新收購，舉腳贊成。組合第3大主力。

打字打到想嘔，同埋最近有點網球手，下會見。