有點感觸

諗左幾次呢篇文應唔應該出, 因為係病中所寫, 有啲灰, 同埋帶唔到太多價值比讀者。當我比自己既少少回顧啦，做人應該向前看，看官看完可一笑置之。

睇到幾位blogger 給「十年前的自己」。可能因為年齡相近, 識逢恒指十年一大跌，自己又病病地多思緒，有點感觸。

十年前大學剛畢業，出黎做野未夠一年就爆發金融海嘯，股票度將我所有補習賺返黎既錢輸曬。但好彩既係當年拒絶左一間國際金融機構既offer, 入左地產界，如果唔係當年可能一入職就比人炒左 XD。

09年就已經入手第一層樓A，10年同家人夾錢買多個細樓B，11年賣出樓A已係百萬富翁。我喺板間房出生，唐樓裏成長，呢100萬對我黎講好誘惑，難以想像咁年輕可以得到呢筆錢 (依家睇返真係好搞笑, 井底之蛙).... 當時以為自己天下無敵, 無深入研究其他分析討論, 就認定CCL 無法超過97時的100點。

亦係呢個幼稚決定種下禍根... 賣樓後睇住個市猛咁升, 非常惶恐。而且變得心高氣傲, 不停同家人女友口角，差啲搞到要同女友分手。嗰幾年啲股票, 一隻阿里巴巴, 一隻中國動向, 呀仲有「老師」的272同中人壽，已輸到我PK, 再加埋啲細價股......所以曹Sir 話三十歲前發達, 係家門不幸，確有其道理, 人年輕總要衰幾鑊先學精。

當時年紀, 要我承認錯誤, 然後再用高50%價錢再衝入樓市係極度困難。最後在13年終於痛定思痛重新入市，但一來一回機會成本極大(嗰幾年啲股票, 無將嗰100萬輸返已經算唔錯....)，令我錯失13年後樓市橫行甚至下跌的入市良機。

14年終於喺結婚裝修等等大開支情況下咬緊牙關「掃」左2個車位。15年認為有樓有車位應該要專注點事業，開始創業之路，一搞就3年，幾多辛酸, 幾多麻煩野, 重有要輸幾多錢......真係數之不盡。做生意好幾次都忍唔住在太太面前垂淚, 當中壓力, 真係不足為外人道。到小生意慢慢穩定，抬頭一望，CCL 已經係150......

如果大家知道中間我出左去睇幾多次樓, 而每次都係覺得生意重有錢要洗，唔好搞咁多野，就知我有幾吐血。又如果, 當年的阿里巴巴一直揸住, 生死相隨，無令我驚左創科股，依家又係咩世界?

呢十年, 做實業不如投資磗頭係事實, 而搞創科又強於投資磗頭，我就唔拖唔水>_<。講真, 一開始專注啲, 以我既專長集中火力在樓市，依家生活水平層次應該係另一個世界。

雖然依家曲曲折折行出黎人生仍然幾好，但我仍然貪心，想要更多自由... 有時忙完一輪, 小孩終於瞓著, 夜闌人靜時, 不禁會輕輕啍起:

這十年來做過的事
能令你無悔　驕傲嗎
那時候你所相信的事
沒有被動搖吧
對象和緣份已出現
成就也還算不賴嗎
旅途上你增添了經歷
又有讓稜角　消失嗎

軟弱嗎
你成熟了　不會失去格調吧
當初堅持還在嗎
刀鋒不會　磨鈍了吧

老練嗎
你情願變得　聰明而不衝動嗎
但變成　步步停下三思　會累嗎
快樂嗎
你還是記得你跟我約定吧
區區幾場成敗裡
應該不致　麻木了吧
快樂嗎
你忘掉理想　只能忙於生活嗎
別太遲　又十年後至想　快樂嗎

談談我對比特幣及掘礦合同的想法

Er... 其實我半點不是IT人，其實我講踢波會叻過講加密貨幣，其實我第一桶金都不是由比特幣而黎，其實我係地產專業，其實我無咩資格講比特幣及掘礦合同。

不過，個blog 成立以來第一個留言係問關於比特幣投資，而我亦留意左虛「疑」貨幣半年及讀左唔少相關書藉。我嘗試用layman角度分享下自己既睇法。

首先，加密貨幣既技術係前膽的，個級別係諾貝爾獎水平。加密貨幣既操作已証明係可行，現時找換為各國貨幣，交易所炒賣，轉帳等等都係安全的。中間的交易費用仍高，但將來有空間降低。

加密貨幣既應用會越黎越多，尤其喺黑市或者地下市場。軍火，走私，賭搏，黃色事業，總之嫖賭飲蕩吹，你諗得到既地下市場就係加密貨幣生存既空間。

加密貨幣既供應量係無限的，但其中能被認可既只能係極少數貨幣。只有極少數貨幣能最終生存落黎，甚至成為其他數字貨幣既入口。暫時只得比特幣及以太幣有呢種趨向。

比特幣係不具備所有貨幣既能力，但其作為一種儲值工具係有其價值的。你有冇儲過郵票, 威士忌, 黑膠碟, 甚至係模型? 有一定功能，而產量又受限制既物品，必然有其價值，不過無人知值幾錢。

以成本法來看，挖礦難度不停上升，礦工投入既成本不停上升，如果比特幣既「價錢」(非價值)沒有難度升得那麼快，沒有人會再去掘。掉轉黎講，如果無人再去掘，比特幣既產量就突然鎖定在某個位，其時如果仍有人使用比特幣及值某價錢，必然會再吸引人去掘。所以，雖然唔想有呢個結論，一般情況下，比特幣既升幅會比掘礦難度提升要快。問題係之前比特幣4個月內升了3倍，挖礦難度需要1年先追得返呢個升幅，所以短期內挖礦難度係有機會升得快過價錢升幅。

價錢方面，完全係投機炒賣，咁我用返股票既阻力位去睇，港幣110,000, 90,000, 72,000, 45000, 37,000, 22,500 係幾個阻力位，亦可以話係支持位。

掘礦合同其實本質係一張比特幣牛証+定期Div payment, upfront 比左合同錢, 個幣跌到某個價錢就打靶, 中間每一日都會有超高利息比返你，賣掘礦合同既礦場就係莊家。如果比特幣價錢升，其實掘礦合同回報可以好高，風險當然係一跌到打靶價就死得。假設比特幣現價不變，因為難度一直提高，到最後合約大約要輸8-17%(毛估估)本金。呢個8-17%本金其實先係張合同既基本價錢。當然, 你一買張合同即刻跌到打靶價, 波幅指數咁高, 抵輸......

穩陣啲講，掘礦合同係高風險投機項目，但如果你對比特幣超有信心，其實同買恒指Call 輪差不多，你以為掘礦個風險會大恒指Call 輪好多，又不然。每日都有人賭恒指發達或破產，其實唔新鮮。當然如果比特幣個價唔變，咁又無咩必要買挖礦合同。另外就要睇個莊夠唔夠實力? 友唔友善? 打靶價係幾多? 合同價係幾多? 現價每日派息幾多? 計得掂數就可以入場參與。

就咁買比特幣，就當買黃金咁，中間無任何股息回報，只係比你欣賞個虛「疑」數字。當然, 你有Trader既身手，因為波幅夠，其實Trading 係有人揾到食。

我既取向係Fear of Missing Out. 掘礦又有點, 炒賣幣又有點, 儲值又有點。只要知道自己投入既本係咩 (我係牛3啲profit 加少量成本, 佔投資組合低於2.5%), 投資緊個趨勢係咩(賭比特幣會穩步發展)，最壞結果會係點(最壞輸2/3即投資組合1.67%)，我又唔覺得會輸死人。

之前在另一位勁blogger 度留言，勁blogger 覆我佢無投資虛「疑」貨幣，但有投資區塊鏈，我覺得一言驚醒夢中人。成件事最賺到一定係背後既系統或者區塊鏈發展。我希望以後有機會好似嗰位勁blogger 咁有足夠實力去投資一個平台。

因為唔係專家，歡迎大家指正及討論。

(風險聲明: 比特幣絶對係高風險投資，上述討論不構成任何買入/賣出建議，風險自負)

牛3 - 享受泡沫 抬錢買「貨」

2個月前[牛3未完]篇文寫到:

「恒指衝上30,000, 街邊全是講股人，但我傾向牛3仍未完結，23號的回調雖然強烈，但令市況健康一點。

之前反而怕如果恒指繼續上衝, 死得更快，依家借A股大跌調整一下，未嘗不好。」

「牛3未完，但就好似調戲一個索到爆泰國人妖，樣同身型翻版林志玲咁，摸到裙擺，好諗定幾時收手啦，到時走唔切呀！」

當日操作係開始減部份收息倉股票，嗰類股高息變低息，抬錢去虎門買樓。太多次發覺股票賺到的錢落唔到袋，所以咁樣分段食糊係非常有需要。之前會諗短期係咪儍仔左，但最近虎門樓同人民幣都升左，實際可能除笨有精。

最近炒倉亦開始減貨，8008, 806, 1579, 內銀, 航空，抬左啲錢去買汽水機及夾公仔機及微量bitcoin (襯住佢大跌)。除減貨外亦有作換馬，加加減減下反正以增加現金為主導。炒倉現金大約20%。

下一次減貨希望啲錢可以搬去買日本樓了，泡沫中既錢最易賺，平日辛苦儲嗰1萬幾千，泡沫中可能幾個交易日已喺返度。

由泡沫裏支取現金去買其他想要的「貨」，就算之後賺少左，個感覺仍然很不錯。炒股賺錢之餘，心理健康亦很重要。

2018 第一單好消息

"剛剛開年不久，東莞土拍市場又開始熱鬧起來了！1月11日（今日），虎門博湧社區地塊將在東莞市公共資源交易網公開出讓，万科9.14億喜拿該地。據悉，這是2018年東莞首宗公開出讓的商住地塊。據公開資料顯示，該地塊佔地面積約2萬㎡，總建面約6萬㎡，起拍總價60149萬元，折合起拍樓面價10000元/㎡，最高樓面均價是15199.92元/ ㎡。

該地塊將不再採取“限價+熔斷”的方式出讓，而是轉為“限價+競自持”的出讓方式，當樓面地價達到15200元/㎡，總價超過91426萬元時，將轉為“競自持”環節。與去年10月份的出讓條件相比，地塊最高樓面限價由去年的14500元/㎡調整至15200元/㎡，平均每平米上漲了700元。

此外，政府還規定，當競買人報出自持商品住房面積比例為30%時，仍有兩個或兩個以上的競買人要求競買的，競買方式轉為競該30%自持商品住房的自持年限。按照最先報出自持最高年限（70年）的原則確定競得人。"

-11 Jan

http://news.dg.fang.com/2018-01-11/27562545.htm

虎門地價15000/平方米, 由最大內房萬科投得。萬科不單止出高價，塊地重要係有30%唔比賣，70年純出租。呢塊地近萬達廣場, 嗰邊有個萬科雲城賣21,000/方已經清曬, 所以萬科係絶對清楚虎門既市場。15000/方連建築費稅費利潤, 賣24,000或以上先有數維。重有些少賣價要補貼30%出租樓面，如果中國及深圳唔出事，我估3年後要賣26000了。
我的單位買了後1個月內已有5台客黎睇租盤, 雖然租金回報不高, 但年尾租務市場活躍度可見虎門的潛力。曾經有位blogger 話中山啲樓升虎門係最受害, 但實情係虎門啲樓易租過中山好多。中山靚單位升價快啲, 虎門"低端"打工租務需求大啲, 各有優勢。

我之前層樓買14000/平方米, 平過個地價, 講完。

2018雜談 -1

2018年首日思緒雜談:

1. 買入日本樓- 日本樓風險其實很高, 尤其是高空置率及yen 跌, 可能賺埋都唔夠輸。所以一定要鎖定喺城市中心區, 低水及合理維修費。

2. 學寫app- 依家先黎學好似太遲, 好似阿伯學上網咁, 但我相信沒有最遲, 只有更遲。希望做到自己公司既一個APP出黎!! 努力學習!

3. 擴大收息倉- 坡子嗰面其實重有好野, 唔知有冇好價入。基建, 紡織, 消費似乎都可以。今年第二年管理低7位數基金, 期望5年內成長為中7位數倉。暫時睇今年有一波牛市, 要好好把握。

4. 緊貼大灣區規劃- 傳聞港資到大灣區起醫院/學校/老人院會有優惠。一定對深圳虎門樓市有影響。

5. 火燎森- 我選擇相信佢買入汽水機及夾公仔機, 佢似乎喺大陸受完挫折個人唔同曬。我亦選擇相信區塊鏈對日常生活帶黎既轉變。***補充: 高風險高回報, 大家自己要計算承受能力。我大約都係由上年股市賺到既錢作投入，預左輸1半咁買

股票投資方式寫兩句

今年的投資理念跟以往有所不同。

大注, 如超過組合5%的, 專注於收息股。但收息股中如果係低息但成長性肯定的, 我接受程度高左好多。

中注, 佔組合3-5%的，有時間限制的, 專注於事件驅動股。呢類型股最麻煩係比時間磨死, 所以需要精心挑選，緊貼通告。事件驅動型又分小勝例如幾個月幾個%, 或有機會1年賺成倍的，要小心分配注碼。

小注, 1-3%的, 睇技術走勢, 順勢而為, 食到應其實好和味, 精挑3-4隻, 太多自己處理不到。
試注, 0.5%左右, 作為觀察倉, 比較彈性大, 勢不順就斬, 勢順會加。

2017年回顧

2017年所有計劃其實都因為小兒來臨而有所調整，不過大方向都不變。藍色為達標，綠色為達一半，橙色為需要注意，紅色為唔掂!

原本的計劃︰

1. 將不太賺錢的其中一盤教育小生意賣盤。 --> 年中時終於順利賣盤，投入的時間心力跟回報不成正比，賣盤令自己多了時間做幾他事情，非常好!

2. 維持另一小生意的日常運作，穩建過渡。-->成績還好，雖因為要迎接新生命而減少時間投入，但畢竟已運作了3年，有頗為穩定的收入，很欣慰。

3. 適應新工作環境並希望做出點成績。-->經常北上，其實很累，但叫做見識多左，熟悉多左大陸既市場，不過內地政策偏緊，港企影響力減弱等因素，很難做出成績。開始要思考放棄打工條路。

4. 股票被動收入達到每年10萬元 -->達標的，其實仍有現金在手可以增加股息回報。下年希望達到12萬咁上下，每月穩定有1皮幫補下。

5. 計劃換大一點房子準備生小朋友 -->由2016年開始一直做唔到呢點!! 其實2016年年中有很好的買入點但因為開展教育小生意而錯過了，後悔至今。年尾買入虎門單位，叫做呢個目標既變奏版。換大點房子呢點太多野可講，另文詳述。

6. 多做運動，保持健康身體 -->年中還可以，小兒誕生後運動量劇減，需要正視呢個問題。

7. 對家人朋友好，享受親情友誼 -->應該還可以的, 人大了, 愈來愈著緊身邊既人。

8. 後加: 希望母子平安，順利誕下小生命。-->順利的, 小兒出生後亦健健康康，頗為可愛，雖然辛苦太太受生產之苦，照顧小孩又用很多時間，私院陪月滿月宴BB用品洗費亦大，但我竟然都覺得非常值得，小生命真係好神奇，改變左我好多觀點。