牛3 大機會已完結

之前話牛3重有機會資助我買日本樓，隨著2月份的一支月線大陰燭，呢個希望越黎越細了......

呢2個星期不停作出搏反彈的動作，包括買入牛証(但莊家開價太不公平了), 買細期,  2828, 加埋之前一路持有既1055, 1558等, 回報都還可以, 不過玩到提心吊膽就是了......

隨著2月份的一支月線大陰燭，我正式加入淡友陣營，尋日落指令將剩下的MPF 都轉到保守基金，同埋沽細期。

牛3喺咁既情況下完結，既無煙花，亦無人大創傷，實在不解。最近大公司既業績更係不錯，令我更加不解。但我尊重二月份呢支大陰燭，恒指前面既路，唔係咁易行了。

以下沽期技巧探討。

利申: 個人認為，沽期賺返357萬係唔困難，但要發達, 長揸優質股, 儲派息股應該更簡單。關鍵係個銀碼大小。有幾多人夠膽沽幾張大期? 沽1張大期都手心冒汗, 心跳加速, 精神不能集中了。

你揸派息股可以用埋槓桿都笑笑口過日子，揸優質藍籌屋苑更係有咁多, 借咁多。你試下借貸沽期，好快IFC天台見。

我都只係初哥，以下10招，純粹作個紀錄:

1. 大勢要好肯定係會下跌先沽期, 睇錯大勢, 死緊

2. 既然大勢要跌, 目標食既波幅應該要係1000-2000或以上, 成日諗住50-100點就進進出出, 死緊

3. 股票可以玩追貨，但沽期一定要set 定喺反彈高點黎沽, 追沽而被夾返轉頭, 死緊

4. 如大市不似預期, 掉轉頭升高過圖表的阻力位 (正常為沽貨點), 可預留80點空間止蝕。再升高點時再沽過。大勢如無捉錯, 呢種每次輸80點的入市成本係有需要的

5. 經常intraday 或隔日會有2-400點的利潤可食, 但心理上一定要無視，因為好快就會chok 到無左。如果經常考慮miss 左2-400點，心理壓力會非常大。心理一亂, 死緊

6. 點解2-400點唔食? 因為你沽期好多時都死緊, 喺咁高風險之下, 睇既回報一定要過1000點，否則唔應該玩期指。同埋一食後, 佢升返更靚既位比你沽就當然好, 一口氣直接插落, 你就被逼追沽, 死緊。

(呢度有個心理關口一定要捱過, 就係all or nothing. 唔好諗住密食當三番。估中大勢下沽期, 一係就大賺, 一係就輸每次進場80點費用，夾埋可能最多輸400點咁。)

7. 沽期只有好特別既時間點先可玩, 例如牛轉熊先玩到一次。成日忍唔住賭下, 死緊

8. 如果個大勢中左，第二張期指入市時間用返3既方式。疊沽期指從而放大盈利。

9. 最難, 假設恒指由32000跌到28000，我由31000開始沽，大約1000點加一張，即係3張分別食3000點, 2000點及1000點。到28000時, 利潤已經非常不錯, 但到時就會覺得牛轉熊一定會跌到25000以下，放是不停加沽, 心雄發啦~~~~!!! 市況一反彈，由大贏變小勝甚至倒輸，心理亂曬，又係死緊。

10. 個人認為2-400點無視, 但個利潤都滾存到成2-4000點時，係要諗食糊的。沽期指非常費神，戰線一拉長，期間有反彈，有政府救市，好多市場噪音，令你心慌。死緊。