2024年近況

1. 小生意方面:
估計係創業以黎最差的一年，應該係香港人都會感受到，社會上處處死氣沉沉。政治是一方面，但新一代的消費習慣也有影響。

現時大家都動不動就Google 格價，朋友間少聚餐，大家都唔鍾意夜蒲，好似男仔一齊打下波都變少，實在難搞。類似的草食系，在日本都很常見。是否社會越發有壓力，或者越富足穩定就越會變草食呢？

2. 家庭方面:

兩個小孩開始長大，好辛苦養育但又甚多生活小樂趣。如果唔生的話，人生真的很輕鬆，但應該人生這幅砌圖就無砌滿。

之前有朋友的母親過身，佢媽媽有一句話好打動我︰「我看過了這世界最美的風景，所以不用掛心我。」這是何等的見解T_T 有小朋友令我睇到這個世界多很多。

如果因為怕辛苦而唔去生，以整個人生黎睇，似乎係錯過了更多。

3. 投資方面:

主要都係中港股票收息倉。其實以整個家庭呢幾年的儲蓄計，呢個收息倉規模唔算大。由此令我領悟一個大道理，其實後生既時候，講好多咩組合每年賺20%回報, 意義真的不是很大。

當Fresh Graduate 出黎做野，儲左3年錢，正常咪得50-60萬本金, 每年20%當然是非常出色的投資回報，但每年回報總數也只得10-12萬。如果做野做得出色，升職快，有些工種真是一年頂人幾年的投資回報...... 投資既野要學，但當無咩本金時，也不要用太多時間去學。年輕時努力賺取工作經驗，儲多啲本先啦!

最近恒指好似有啲起色，我仍然堅持之前的觀點，恒指係熊到尾聲的時間，甚至牛市已悄然來到。又睇下今次估唔估得中了。

4. 樓市方面:

我最在行的始終是樓市。2019年買入樓C後，CCL跌左接近30%。樓C固然都下跌，但因為買入時個價唔算貴，而且在市中心，樓C估價叫做比買入價跌左15%而已。當然樓A及B都有跌，咁都無計架，生活在香港，唔通就完全唔楂樓？長遠黎計實在不可能。

最近天璽天已經係超低價發售，但有沒有發現為什麼都係唔夠錢買？現時世界的堅尼系數一定已經係痴左線，唔單止香港，你去下台灣, 上海, 深圳, 或者係倫敦Zone4以內。有咩你係覺得平？無，貧富懸殊得太厲害。

作為中產，亦肯定有分成上中產，中中產及下中產。上中產我當2公婆都係做ibank/醫生, 2個加埋5M一年, 咁先叫做買天璽天大單位係合理。中中產我當2公婆係做銀行, 公務員, 2個加埋咪3M人工, 買一個700呎的天璽天要1700萬，也不是簡單的事......但我想話最近1700萬樓在上海熱銷.... 這是什麼時代？

如果長遠要住在香港，樓市現時是buyer's market的情況，睇中岩價，就應該要出手了！

以上是近期的觀感，少有數字的依據，卻有人生的體驗在其中，共勉之。

2023年展望

 生意方面:
1. 今年希望再請多一個員工

2. 儘量令自己抽返多啲時間出黎，處理未來發展，多於每日埋首苦幹

3. 公司的流程及編排上要再深化，儘量系統化

4. 如果可以唔返公司(或者一星期返2-3日)，都大約維持呢2年的生意額，咁就最理想了，到時可以再諗下有冇其他小生意可做下呢！

樓市方面:
1. 股市10月見14800底後, 樓市半年後見底的話, 大約在4月

2. CCL 會再跌10%? 定係完成高位30%的調整到133點? 個人認為跌到146點已有很強烈支持......

3. 但如果CCL見140點以下，我有興趣再買入一個700-800萬左右的單位的。如果CCL 見13X，市區大型屋苑呎價好大機會在14-15000/呎, 呢筆錢話唔定買到一個細3房呢。

股市方面:
1. 牛市重臨係大概率，如果11-12月2條月線大陽燭都說服不了你，那也沒辦法

2. 我基本上MPF 及可動用的現金都撲入股市了，坐等風雲起

3. 今年就錯在沒有將後備資金也一股腦兒投入股市，我一般預左1.5年的家庭洗費作後備資金。亦沒有將公司的資金抽出來投放到股市.... 知錯了....

4. 股市的回報我預計短期1-2年內會高於樓市的

家庭方面:
1. 上年玩左一季的報小學遊戲，暑假時要繼續，在香港讀書真辛苦... 希望幫大仔搞掂小學學位，咁一家人都可以安心

2. 2年多沒去過旅行了，今年希望能安排復活節同聖誕去到2個短Trip! 不過一家4口去旅行真係千金散盡的感覺

3. 幫2個小朋友安排返合適的興趣班。為了慳錢, 要善用康文署XD

4. 身體各關節其實都強烈發出警號，今年是時候做多啲運動了，無藉口了。先定個小目標係一星期跑2次30分鐘的步。希望年中後可以增加多一個月一次打波的機會。無健康真係咩都唔洗諗....

過去2年，生意上慢慢穩定下來，家裏有工人姐姐之後，亦穩定下來。感覺各樣事情都在軌道上，希望今年可以謀求突破!!

熊市底部範圍

我沒有預知能力，但很大機會，現時已是港股的熊市底部範圍。這個熊市由2018年1月的33484點， 跌至2022年3月的18235，跌幅為45.5%，歷時超長的4.5年。

為什麼不直接說是熊市底，而是範圍。因為月線還未有一根陽燭出現，未能確認18235不會再穿。但是，根據最近最有動能的股票來看，再次試底的機會是極低的。

如果港股再穿18235, 下一站是17000, 之後就是2018年的10676。

2008年大熊底部沒有錢，2016年時算有把握到，希望這個十幾年一遇的大底能做得更好。

熊市是否應買屋先岩...? 在2008年時對的，在2016年時亦對，如果手中沒有任何物業，yes, this is the time.

如果有物業在身，再入收租樓，住宅回報現時通常在2.8%左右，7M樓，如當借60%，首期要2.8M，首期較大，借款4.2M，當2%息(下年應會追返少少美國加息)，物業稅16%，七除八扣，本金回報大約3.5%? 好似唔係咁有so... 要能借得多，唔洗交稅，會著數啲。

當然樓價升咁5%就35萬.... 2.8M首期你唔會敢全部投入股市，所以樓市升的話，在股市中唔知幾時先賺得到呢35萬...

結論係，未有物業的，快啲去鋤價，有物業收緊租的，人名物業稅50%首期重重關卡解決唔到的，買股啦...

我暫時屬後者，所以這次先炒股為敬~!

世界大亂 心水要清

 上年9月時寫過以下一段:

'''2. 恒指爆完又爆的應對之道

老老實實，最大風險黎自美股。美股一個調整，可能令全球資本市場大吃驚風散。尤其恒指，左一巴右一巴係有少少機會會穿上年3月底...... 不過我係燈神，睇下就算了。我完全沒有說美股不好，美股勁既公司重好多添，但物極必反喺股市係真理，係人心。投資美股的朋友要步步為營了。

相反，我覺得港股及A股係可以慢慢物色合適的投資目標，留待美股調整後再布局。暫時港股最強的Sector 睇落仍然係醫藥, 消費及電相關。如此政治大局下，全球無樂土，要想突破自己，是時候要適當地做點全球的資產配置。'''

********************

原來自己寫文的時效係半年以上，睇野太長遠，短線經常吃虧，長線又成日楂唔穩，其實不是什麼優點......

美股大調整黎了，不要迷信TSLA, GOOG甚至APPL 會頂得住，要調整既總要調整，此乃人心。

恒指真的穿2020年3月底了，而且在無聲無息中穿底，看來風險仍未完全釋放，但是，已經極近底了。

相對應地，我將MPF 由50%持倉增加至70%H及A持倉...... MPF 由2018 年後就很少動作，今年終於可以出動了。

另外亦會動用現金，尋找下一轉的牛股... 暫時睇黎仍係醫藥, 消費, 清潔能源相關。

世界很亂，但有幾點要看清楚:

1. 香港的疫情總會過去的。相信3星期後老人家(70歲以上)的2針接種率會在70%左右。之後每日都會有幾千人感染，但亦會慢慢共存了。嬰孩比較困難，做父母的辛苦了。大家加油頂住！

2. 俄烏戰的道德評論不說了。經濟上俄國為農產品及石油大國, 就算打完仗了, 相信國家間的不信任會持續，大宗商品價格都會急升，導致更高的通漲。

3. 美國通漲已失控，加息太快又死，加息不夠快大通漲很易會導致經濟衰退，不過無論加息快慢, 美股的大調整都是不能避免。

4. 港股很慘, 還會更慘, 但已很近底了。黎明之前的黑暗都是很灰的，用了5年時間，大概可以完成大型熊市這個惡夢了吧。

5. 中國很多好難頂的事情，中國式XX，小紅粉，戰狼外交... etc. 但個天似乎真係眷顧佢的。打仗係俄佬打先, 比大家見到統一要付出既成本。由清零變共存的關鍵點亦由香港慘痛示範左，估計內地好快就會老人小孩全面打針。而且，全球大通漲需要的解藥，剛好在中國都有，農產品，商品之類的。

中國喺學習人地慘痛經歷既能力係極高的，暫時看來國內維持5%左右的經濟增長係樂觀的。鬥好未必贏到人，但中國鬥唔輸得多的能力是很高的......

不知道香港熊轉牛的拐點是什麼，樂觀一點，可能是比較賢能的愛國者治港吧! 不過也沒差，香港從來都是一個極端經濟化的城市，來的人就看錢, 熊轉牛後生活自自然然就會跟上...... 

股市經歷最黑暗的一段, 但亦是各年輕人人生其中一個最關鍵的機會 (老一輩說人生會輕歷3個牛熊, 這次是我人生經歷最大最長的一個熊市), 10年後不要再說時代沒有給你機會了。

記小兒成長(二)

這篇似是日記形式記錄下湊仔的心境, 有點婆媽, 不喜勿入。

大仔不經不覺已4歲，開始有點自立，懂自己去厠所，食飯都7成自己食 (另外3成係要逼佢食多啲, 太瘦!), 著鞋著襪都唔洗太操心。雖然仍有很麻煩的時候, 總體是很討人喜歡, 很和平的小孩。

大仔的性格及長處都慢慢突顯出來, 他比較温柔, 觀察型, 有時對一些小節很麻煩地著緊(處女座?), 很喜歡同其他小朋友玩。興趣是畫畫及比較少衝撞的活動例如踩單車, 游水。長處是畫畫及有語言天份。

跟自己期望很不一樣呢。以為小孩一定會像我跟媽媽一樣, 喜歡運動, 數理較強, 比較獨立。到最後完全不是這回事, 哈哈

比起幼年期, 感覺現在踏入了教養的另一個階段, 又要重新思考整個家庭及香港的教育......

香港有著逼死家長小孩的教育制度, 但又不能完全說是香港的錯, 新加坡及台灣又何嘗不是充滿競爭的教育方式... 因此, 心底裏對國際學校的選項也沒有完全排除。

下年就要開始玩小一面試的遊戲, 我決定以文藝人的角度包裝小兒, 唱歌, 畫畫, 吹水就係佢的強項, 亦會有不俗的學術根底, 就看看會發生咩事 XD 老實說, 極為擔心...

-------------------------------

細仔就快一歲, 惡霸一名, 跟大仔在一起時, 破壞力極為驚人。返工累, 回家湊2件簡直尤如死去活來。教仔係我咁大個仔真心會在心底大叫: 「屌啦媽, 頂硬上啦」的活動。湊大2-3件小朋友的家長, 受我一拜, 真心敬佩。

之後有工人姐姐加入家庭團隊, 估計會take over 家務。可惜，教育真的沒有捷徑, 在外國生活又好, 香港又好, local 或i school 都好, 只能咬緊牙關自己教, 不能假手於人, 所以教仔的重擔仍然會在2公婆身上。教仔昂貴, 就是因為要時間心力!

------------------------------

tsla 衝破1000美元一股, 想當年在tsla 70元時買了HK50000, 如果楂到依家值300萬你話世界幾美好... 可惜在未拆股前的150元時已好開心take profit... 其實還有類似的例子在bitcoin及美蘭機場... 真的要了解自己的長處及操作弱點，永遠是賺粒糖.... 以後仍有機會在一隻投資物上賺取過1M 嗎?

至今大部份資產都是由房地產及車位投資獲得... 有時真係很心灰會思考是否基本可以放棄投票投資, 專心打理生意以及維持收息倉就算了, 心理可能來得更健康......

瑣事幾則

 中秋佳節，無心工作，寫下文希望快啲可食中秋飯 XD

1. 共同富裕下香港地產商的應對之道

已有很多傳媒大唱香港地產商死得，香港樓市又死得。不要信...... 香港樓市的根本問題係供應不足，地產商捐下地走唔甩，但睇唔到任何理由中央要強行回收私人土地作發展。如果中央強行回收私人財產，將係中國浩劫，完全沒看到端倪會有呢個情況發生，切忌人云而云。

香港地產商第一係要加速推進公私營合作項目，第二係捐下地做慈善，第三係起樓後要薄利。如果真係香港樓宇供應能夠加速，加倍，將係香港人之福。我相信如供應量追上，單單是就業以及財富效應已可非常厲害，結局不一定是樓價跌。

仲有一招要過比地產商，最近所有政策都係針對人口問題。所以地產商要將資源用於鼓勵生育上，自然會行得正企得正 XD

2. 恒指爆完又爆的應對之道

老老實實，最大風險黎自美股。美股一個調整，可能令全球資本市場大吃驚風散。尤其恒指，左一巴右一巴係有少少機會會穿上年3月底...... 不過我係燈神，睇下就算了。我完全沒有說美股不好，美股勁既公司重好多添，但物極必反喺股市係真理，係人心。投資美股的朋友要步步為營了。

相反，我覺得港股及A股係可以慢慢物色合適的投資目標，留待美股調整後再布局。暫時港股最強的Sector 睇落仍然係醫藥, 消費及電相關。如此政治大局下，全球無樂土，要想突破自己，是時候要適當地做點全球的資產配置。

3. 風起雲湧下的教育應對之道

未來需要的技能與閱歷，中文要好，英文要好，要懂中國文化，要識西方禮儀。要懂電腦程式，又要有創意萬千的腦袋。未來是超級醫藥，太空科技，人工智能，metaverse 的年代。全球最大消費市場在中國，最好的大腦暫仍在西方。

小孩最可貴的是那顆自由的腦袋，但如果不是最尖端的人才，面對最大市場卻是最容易生活。立足香港，有定後路走向全球似乎是可取之選。沒有必要衝動決定，多理解未來世界才確定路向也不遲。

各位中秋節快樂, 人月兩團圓, 珍惜家人相處的時間!

躺平主義與社會階層

躺平主義的出現並不意外，社會階層的不流通，令年輕人無論如何努力，都是在自己的階層裏掙扎。

單單是樓價，10年前如果買入了一個3房單位，這10年間升值的幅度是很多人一世的儲蓄收入。漸漸地，有樓都變成一個階層，其他更高層的，更是人生難以跨越的一個鴻溝。

另一個引領躺平主義的是娛樂，一個免費的youtube 已足夠一個人十世的娛樂，還未計手機game，睇波等等比以前強1萬倍的娛樂項目。還有就是現代社會物資的充足，老麥，簡單自己煮個面等，根本用唔到好多錢。還有就是工作壓力，雖然現時的假期等比以前已多很多，但工作的強度亦極高，20年前返8個鐘可能得4個鐘做野，依家有些工作真的是12個鐘全集中地做......

寫寫下，如果我是十幾歲的年輕人，可能都會覺得躺平比努力更舒服。

社會階層一直都存在，小弟卻活到幾十歲人先察覺到階層難以突破的璧壘，真是魯鈍。其實依家啲年輕人(講到自己好老咁XD) 真係好醒，好細個已察覺唔對路。

舉2個階級例子:

1. 高端中產階級: 一對夫婦朋友，一個是ibanker，一個是專科醫生，其實也不是什麼特別的結婚組合，城中多的是。有日醫生跟我說有個club 重新開放會藉，好抵，快啲排隊。終身會藉只是20多萬，......翻查資料，這個會藉20年前只是2皮野(仲要有世襲制)，20年升值10倍。其實會藉也是一個投資，你要如何以現時的價格去追別人20年前已擁有的？

2. 小豪門階級: 與一位大學同學吹水，她嫁了入一個小豪門(即唔係會上雜誌, 但又起碼在全世界幾十個物業的家族)。在做作與不經意之間透露平日hae 爆但又要揾件事黎努力的生活。講真，要如何做才能跨上這種小豪門的階層? 

在內地情況嚴重一百倍，一眼望去，小官員，中央高官等等，自己人生不是沒努力過，是努力地為自己增值了，而別人的會藉，物業等已升了幾百萬。努力地工作升了半級，別人都從天而降做CEO了。在內循環加強的日子，好大機會這種情況在香港會變本加厲。

寫了這麼多，量出為入，躺平生活，找到生活的小幸福又有什麼錯？世界很殘酷，心裡要平安。

但是，如果心裏面有那麼一點不甘心，有一絲想過出人頭地，就不要躺了，坐起來，好好看清楚人生想如何過，有什麼機會可以彎道追近(已經不敢想超車了)，過一個以後會回味的人生。

有點清楚的是，一直坐office 打那該死沒前途朝9晚5工作的模式已不合時宜，儘量學一些別人不懂的事，虛擬銀行, bitcoin, blockchain, 火箭科技, 電芯, programming, 做直播...etc, why not? 但儘量學得深入，ERROR 搞笑都要玩到盡啦，一件事去到盡係有機突圍的。舊模式越來越走不通，不如就多嘗試新野，真係搞唔掂先返去躺平吧!

2020年回顧

經歷了很刺激的一年。 

年頭創業, 碰著百年一遇的Covid。 

然後3月全球股災，啲收息股跌到媽媽都唔認得。 

年中日本樓2間相繼空置，襯機換埋管理公司。希望租得出, 想喊 T_T 

天災人禍，咩都齊曬。 秋季買左個車位。 

生意穩定，搬左寫字樓。太辛苦，要揾個人幫手先得。算穩定，但又怕手停口停，算站穩陣腳，卻又會掛住以前做professional 既安全感。大概就係呢種矛盾既感受中前行。 

比特幣大升，一路以黎挖落既幣突然帶黎一筆小財。依家又會諗早知嗰時投入多啲去挖。(真係好馬後炮，上年市價3000美金直情都唔想知自己挖左幾多) 

年尾細仔出世，大仔日日在家zoom (癲)，2個月無好好瞓過。唔知以前父母點可以成日搏勤工獎又可以湊大2兄弟... 

股票1/3收息股13新經濟股1/3A股亦有做淡，整體回報約15%，剛好幫補下生仔同奶粉錢。MPF 仍然投入得40%。 

搬埋屋，細屋搬大屋正式做租租族。住屋環境好得超越我想像，諗返轉頭之前幾年以3人家庭計住得有點焗促，無計個人(+太太)懶唔想搬屋。

希望3月前啲傢俬可以入曬，依家有張床同雪櫃生存到先。 

COVID 中請工人姐姐，投入的時間及金錢都係平日既double, 希望到時工人醒醒定定。 

1年好似做左平常2年做既量，想吐血，如果年年係咁好易早死。

踏入人生最大開支既時段，每月儲蓄率急跌，兼且做生意始終有風險，從來無諗過自己會行咁高風險的路，要一路小心謹慎。但，踏出舒適圈，才發現依家經歷既，有可能先係真正既舒適圈。

2021年暫時要做既: 

1. 好啲既time management, 唔可以事事拖到最後一刻。 

2. 學習管理既一年，工人姐姐, 公司請人等。 

3. 樓C收樓!快啲出租幫補家計 

4. 楂車補鐘，唔想買七人車，但似乎無辦法。同腦海中駕駛住porche 去識女仔既自己相去越來越遠 (笑)。 

5. 處理日本樓。如真的繼續空置會賣出了。yen 紙升值大約5%, 成個投資都算打平手既, 輸時間值?....觀察... 

6. 希望疫症過去，做返多啲運動，同埋去到旅行(應該係世界性願望) 

7. 生意上會有app 推出, 完全係一條新戰線, 希望自己handle 到 

8. 其實好多野想寫，但湊住2件唔洗返學的小孩真的不容易。希望keep 到2個月一篇文

雜記

接近半年無出過文，這次雜記生活一些事情，熱返支筆，之後可能先詳細寫其中一二事：

1. 小生意幾好，揾緊新寫字樓，因為要請人，舊位唔夠用。其實之前都無諗過用唔夠一年就要揾新舖，算係超額完成今年目標？？

2. 黎緊又有多件小生命降臨，其實做細都無咩著數，掛住理個大佬，細佬連胎教播下音樂比佢都無，更唔好話讀詩詞歌賦呢啲premium service

3. 因應又多一件呢件事，正式啟動請工人程序。多年黎都唔想請，屋企住多個人實在太唔習慣... 

4. 另一個行動就係買入一個車位，準備如果真係有需要就會入手車一部。踏入人生最大洗費時段，真係有啲驚變大花筒... 不過車位跌左2-3成，又無名既限制，兼可以借5成（如無按揭），我覺得作為投資品其實不錯。

5.港股仲係熊人形態運行中，當然新經濟股熱炒，天堂與地獄同時存在，我個portfolio永遠在人間，無開心無傷心，係咪先係最討厭既經歷？惟有阿Q啲諗，總好過一日開心一日唔開心，情緒比股市牽住走...

6. 樓市越黎越似築左底，日日見到悲情樓市啲新聞真係得啖笑，信足就真係悲情。前排同親戚睇左1個月樓都無平盤，最後抽到新盤就入左。然後下個親戚又等緊大圍站了。貨源係入強手定弱手？

7. 大仔幼稚園開學!!呢件真係疫情之下頭等大事，再唔開學我同太太都會被催毀XD XD 返學的重要就係比家長歇一歇，其實學野youtube 學都得，一半講下笑，但認真的好開心終於有學返，學習自立，識下朋友，唔好再喺屋企做裙腳仔

8. 日本樓非常慘烈，2個租客都遷出左，睇黎有排未揾到租客。Covid 對日本經濟打擊超乎想像，睇返轉頭香港真係算係咁了。日本樓會盡最後努力出租，但有心理準備係黎緊成年都會吉，買外地樓買時風光，差時亦都係慘絶人寰，空著急。虎門樓反而肯減少少租即刻有租客承接，所以都唔好話大陸一團糟，抗疫同搞經濟係有一手。

9. 香港時局，其實就是中國時局的反映，解鈴還須繫鈴人。

創業的樂與悲(1) - 辭職意味什麼

首先講明, 創業係一件好瘋狂的事, 可以好輕易輸錢, 輸感情, 甚至輸去最重要的光陰。創業是似乎有著光環, 同時伴隨無數地獄的一件事。所以, 先奉勸一句, 如果覺得我寫啲野會影響到你放低份工去全力搞生意, 請即去洗個面, 冷靜啲, 不是每個人都需要去做儍事的。儍事留給我呢啲儍人去做吧。

事源有blog友問左我一句, 最近創業進度如何, 實在千頭萬緒, 唔識答。倒不如我組織下寫出一啲創業過程中的樂與悲, 無論最後成功定失敗, 紀錄低, 都係人生行過的一段路。

很多人創業第一件事就係辭職, 我都一樣。而裸辭教曉自己幾樣野:

1. 原來自己的價值咁大, 公司一直揾唔到合適人選坐我個位，一方面市差, 人才流動性低, 無咩人想轉工, 第二方面係我老闆突然良心發現, 發覺我幾做到野, 不停開唔同offer 嘗試留我。大佬... 逝去感情留不住, 你早啲比award 我, 紅蘿蔔引住我先都好, 我都未必會去諗要走的事。

2. 原來自己的價值係零...... 我相信絶大部份人裸辭後的感覺就是, 我以後重可以做咩!!!? 晴天霹靂, 原來無野做可以咁枯燥, 原來主動收入變成0係咁可怕。我是誰? 我對家庭有咩貢獻, 我生活黎為左啲咩? 呢種感覺會蠶食思想, 渴求穩定的心會令你心思思再去揾工。離開comfort zone 的恐懼會一直籠罩著自己。

3. 原來生活壓力是如此巨大。一下子供樓, 四大長老家用, 小孩學費, 兩公婆洗費, 保險 (下刪十項) 全部變成極其昂貴。以前覺得每月總有份糧大把水位, 有盈餘施施然諗下去邊旅行, 依家就計住計住。

4. 原來人係可以咁自由。

5. 我覺得最重要的一點。焦慮是沒有任何意義的。焦慮除了會令自己情緒差，易發脾氣，容易做錯決定，難專注，真的沒有一丁點的意義。好好想清楚焦慮的根源，想辦法，計劃，逐步逐步去做。沒有什麼捷徑，就是面對失敗，面對自我的一個過程。捱得過的話，一定能到達另一階段。

6. 以樂觀精神面對一勝九敗。香港人有樣野係好悲哀: 沒有失敗的空間。從小到大, 一失敗就推算緊接有100個失敗發生。例如上不到幼稚園神校, 就推斷小學中學大學都入唔到好野, 之後就職場失敗, 整個人生都是失敗。這種思維方法沒有容錯空間, 打親波都要贏, 這是不現實的。一勝九敗, 才是真理。在9敗中學習, 在1勝中最大化利益, 然後再開始下一個1勝9敗的歷程。

7. 要穩勝就去打返工，要挑戰自己，大勝其他人5:0就嘗試創業。穩勝的意思是月薪在4-5皮 以上，不到這月薪的，我覺得創業成本其實好低，在成本好低的網上時代值得一搏。

**************
股市繼續燈神mode, 不覺得熊市轉勢, 強股繼續當炒，跟上年年尾市況相近，不同的只是恒指下降了3000點。

最後一跌是怎樣的

比較忙同埋放工返家小朋友精力無限，簡單寫，提一提大家熊市最後一跌的可怕程度是怎樣的。

2年前即大約2018年頭起我已寫牛市已完結，熊市悄然來臨，但萬萬沒想到的是這個熊市之長及煎熬是如此可怕。即使寫了不下10篇文說明熊市來臨，今年年頭市況亦令我以為恒指守穩24500，甚至生出熊市是否已轉勢的想法。

之前我一直以65%收息倉，15%炒倉，20%現金，MPF全現金的打法去應對。到3月中見勢色唔對就平曬炒倉, 只以65%的收息倉, 其他全現金的方式應對，暫時叫做生存到。但收息倉跌差不多18%，即佔整體組合接近12%。加上炒倉的虧損，全倉咁強防守力(自認)都要跌15%。

這令我重新想起08年的最後一跌，當時只是剛畢業，資金有限 (幾年補習返黎的錢...)，但中途2萬點左右入市，最後跌到底時係渣都無。無誇張，係渣都無，跌左9成半。

想說的是，如果是真正的熊市(而這2年的走勢似已證實係一隻大熊)，最後一跌，藍籌可以再跌一半，小股係可以跌9成。大家努力撈底亦真的要想起08年股市中經歷的悲劇。

我相信香港及中國是熊市後最早復甦的一批，但最後的一跌，可以好嚇人。想滿倉捱過去的，要立定心志，不要沽在最低點。

我選擇收息倉昨天再減持15%，即以半倉收息股及其他全現金去應對。收息倉如這1星期再回升的， 不排除再減持至40%。

注意風險，坐穩這部熊市過山車。

打自己工的苦與樂

忙完一大輪office set up，新年前後跑數，終於有時間靜落黎沉澱下這1個半月以黎發生的事。

上年辭職時，已將反送中的社會運動影響計算在內，左計右計，又點會諗到瘟疫重臨咁大鑊。

當1月中知道武漢肺炎大舉殺境時，心諗今翅XX鳥時，1月的營業額卻是穩穩當當，同以前一路做開其實差不多。到2月初大家都宅在家中不消費時，營業額竟然不跌反升!

左度右度，有時都不如test 下個market 咁有用。充滿焦慮，解決不了問題，反而實在地找著市場痛點去做，一方面令我無時間去焦慮，又有機會打個逆境Ace 波，這是我最深刻的感受。

當然，以上是說著漂亮，其實好幾晚半夜瞓醒，都緊張到不能入睡，始終無左份正職，不是月尾就有錢自動飛入袋，公司賺到的亦計劃大部份再投入公司，咁上有老，下有嫩，點會唔緊張!?

再諗多一層，卻又滿是感恩，自己製造的這個gap year，無論天時地利人和，都只能是這一刻。上年如無決心去做，今年更沒有可能會裸辭。今年不裸辭，之後一世都不會做了。

思緒萬千，日日在腦海裏碰撞。其實所有事情都只係開始，計劃都未實行1成，但每日所經歷已好充實，又過癮又辛苦又刺激又緊張。

另外，買回了一部份使用時間的彈性，暫時仍未好習慣，有時賦閒在家就諗，係咪未夠勤力，要再做多啲野? 仍在摸索...

******************
上篇「熊市轉勢?」出完後，股市立即大挫特挫，我正式成為超級燈神。

今次再講明只係估下個市，我認為上月的最高位29174 有排都返唔到去了... 咁快轉駄? 是的，原本「熊市轉勢?」都只係疑問句而已...

操作上我仍是偏保守的打法，收息倉70%, 20%炒倉, 10%現金, MPF 9成現金。當然了，炒股已變成我生活上佔極少時間關心的事，實際操作亦Taken into account主動收入急降這個因素。只係做個紀錄，各位看倌看看便算。

熊市轉勢?

雖然非常忙著新公司的裝修與開張，但因為之前2年一直都係睇股市為熊市，現今情況或有變，幾忙都需要出文修正。雖然睇的讀者不多, 都極怕誤導, 匹夫有責。

我一直睇熊市的原因很簡單, 在於33484的歷史高位後, 月線圖一直未有一條inside bar 再出現。而33484一直跌到24540 亦都真係按所想地行。這個看法令我避過熊市初段的泡沫爆破, 甚至在反彈上30000點時亦都有利可圖, 亦在沽期指上有斬獲。

可是, 這隻熊人很奇怪, 又長又冗, 而且一直不肯再穿底。再加上1. 美股繼續破頂, 2. A股已築底回升, 3. 香港社會事件沉澱中, 4. 中美貿戰暫告一段落, 5. 內地極需香港集資救亡。這次的熊市很大機會以磨爛席代替急跌完成。

終極的一個trigger point 是反彈的收市位29699, 如果再進一步上穿的話熊人宣告死亡, 牛市復再。

我於12月時的策略錯誤, 但幸好有美團, 李寧, 頤海, 平安好醫生等頂一頂, 無完全錯失12月的大升浪。1月新公司開張非常忙碌, 未必很多時間炒股, 希望股友們能順利調整策略, 旗開得勝。

幼稚園面試算什麼

最近完成了5間幼稚園面試, 相信比起很多家長, 一報就是十多間的數量, 自己是輕鬆得多。

5間裏面有1間in 得特別好, 2間普普通通, 1間驚險萬分, 1間喊到豬頭。

最終結果已出了3間, 獲1間取錄, 2間拒絶。

相信各位都明白古怪點是什麼? 就是in 得特別好及普普通通的2間拒絶, 驚險萬分的1間反而取錄。跟其他家長談起, 更大部份是in 得好的, 都被學校拒絶。

經過一次這樣的古怪經歷, 正常應該都知面試是個極度隨機, 毫無規律的一個活動, 更甚者多少人可透過校董校長校監推薦, 又或大B細B, 父母親背景對幼園的利益等等影響結果。整個評核中, 小朋友的表現/潛力/天份, 佔的百份比也實在太少。

如果認為這樣的機制下, 學校一句話就能決定你孩子的價值, 家長們未免是認真就輸了。

有一次跟朋友外出吃飯, 看到她的小孩(4歲多)很頑皮, 又懶又不喜歡吃, 不肯自己走路。 以前已知這屁孩太頑皮, 曾經玩到跌穿頭皮, 縫了幾針, 也不是讀什麼名牌幼稚園。

吃完飯後, 我很深刻, 這頑劣小孩卻在旁諗一本英文書, 故事講述一隊戰隊進入血管中打倒各樣壞病毒, 每頁大約50個英文字...讀得津津有味... 他跟我說喜歡打怪物, 這樣的天賦及性格又怎評價。

有人買最貴的雞蛋希望小孩吃得最好, 有人買最平的雞蛋教小孩為什麼雞蛋可孵化成雞仔。小孩的教育是很昂貴, 昂貴在於家長用多少時間發掘其潛力及興趣, 用多少心血引導其走合適的道路。

幼稚園面試算什麼? 無論結果是怎樣, 掉落垃圾桶吧。

三則瑣事有感

風雨飄搖的日子, 每日的新聞已經夠沉重了, 事件亦不會在短時間完全平熄, 談點別的, 不算輕鬆, 至少不要沉重如斯。

最近在密密處理創業的事, 開始見各色各樣人, 其中幾件事, 值得分享一下。

********

井底之蛙

最近跟一位客戶吃飯吹水, 飲左一支威士忌非常之正, 客戶買的時候都要2千幾一支，心中都暗暗唔好意思, 佢出豉油又出雞, 其實我辭職後真係無咩野可以再幫到佢忙。

之後, 酒酣飯飽, 支靚威亦清剩1/3。客戶有點不捨, 即刻打去問熟店有冇多支可以留比佢。竟然收到訊息話呢支野升到$4000。我更為尷尬... 死火, 飲左人咁多靚野點搞好, 同埋香港亂世中, 唔好亂洗錢啦。點知客戶爽快之極, 「留2支比我!!」

呢件事令我諗起多年前賣一個樓盤之時, 有位客人抽到900萬的3房單位, 覺得好抵, 尖叫左出黎, 重懇請我可唔可以問問老細, 留多一間比佢的故事一樣。

唔係未見過有錢人, 但每當佢地這麼近時, 都令我覺得自己很井底, 貽笑大方了。

********

台灣仔

有一晚跟生意伙伴及其他朋友聚會, 其中一位年青才俊, 台灣出身, 國外讀書, 內地工作及生活十多年, 談吐有著台灣人的隨和。我對台灣人有絶對的好感，在那邊作過實習生, 亦有幾位好朋友都是台灣人。原以為跟才俊會很聊得來，誰不知一加微信, 看到一個不熟悉的黨派名字 - 新黨, 已有點心知不妙。

即刻去個廁所, wiki一下, 只能長嘆一聲, 原來係專門負責兩岸和平統一的, 政治經濟的確很難分離, 真的是晚上食個飯都不能讓人安寧片刻。

********
炒大鑊

有一晚同拍檔傾起生意前景, 我非常堅持新的生意模式計唔掂盤數, 佢非常堅持互聯網生意係一定計唔到條數, 爭論左一鑊勁既。

我有點被說服, 因為我係受傳統生意模式洗腦的人, 諗曬全部出入貨成本, margin稅務等等等。但互聯網模式係你掂就user number 急速上升, 唔得就係無流量無增長。要去估算revenue/expense 等係無從估計, 或者係個range 會大到得人驚, 估黎都無用。

我拗唔過拍檔, 死死氣被說服繼續努力, 如果有人可以分享一下互聯網模式的生意的預測模式, 我會非常感謝。吸多啲知識再去同拍檔爭論過。

(止凡前輩近日的文章標題亦是小事三則, 並非純屬巧合, 是沒有靈感下抄考了標題, 希望前輩不介意)

投資組合檢閱

很久沒寫投資相關的文章, 最主要因為自己快離職, 每月無左一大截現金流, 除左守住個收息倉, 加埋少少炒倉外, 都無咩好做, 但估且講下自己睇法。

股市:
由2018年2月起睇已是熊市, 暫時格局未變。不過這隻熊人又長又冗, 歷時差不多20個月而未覺見底，而且在熊市運行中竟然有大牛股的出現, 例如李寧, 頤海, 維他, 美團等。

這隻非一般的熊, 用時間拉長代替急劇跌幅, 論殺傷力似乎是弱於08海嘯及16溶斷, 論麻煩程度卻是有過之而無不及，海嘯或溶斷都是很sharp, 半年左右的急跌完成財富大轉移，對很多高手來說機會難得, 手到拿來。

這次的熊市卻令人舉步為艱, 大炒當炒股又怕仍在熊市運行中升不到那裡, 收息股又靜悄悄跟隨大市調整, 不停向下破位, 賺息輸價, 中小型股份估價更是低處未算低, 一直向下調, 藍籌又是半死不活, 以為很便宜, 一炒上很快又散band. 做多錯多, 持全現金2年的話, 機會成本又高。總之是磨滅意志, 讓你看不到日出之時。

個人的應對是 保留30%現金+ 60%收息倉 + 10%炒倉+ MPF 保守倉。時間拉長, 收息倉起碼立於不敗之地, 30%現金在恒指不跌但本地股跌到離曬譜時有足夠purchasing power. 10% 炒倉儘量放在刀尖上, 捨棄估值修復遙遙無期的中小型股, 捨棄回報低, 風險高的藍籌(甚至是700), 以市場當炒的做主打。

市場現時的情況是, 錢不夠去推升整個股市, 但絶對有能力對個別股份大炒特炒。拜內地經濟轉型所賜, 下一輪的牛股正在悄悄跑出，市場資金就是如此醒目, 700out 了, 要的是下一隻700。萬一自己看錯, 牛市突然重臨, 相關的當炒股份更會遠勝一般藍籌, 所以跟風炒看起來很儍, 往人堆裏湧, 但卻是這個階段安心立命的策略。如果我不是辭了職, 這個炒法其實可佔整倉40%, 我相信風險反而最小, 因為相關公司真的是在瘋狂成長中。

樓市:
社會運動影響到每個港人的生活, 樓市在向下微調中。二手樓市議價幅度稍微加大, 一手樓第一輪的幾個單位的定位吸引, 其他單位則稍微向下調。

很可怕吧, 如斯浩大的運動竟然只令樓市打了個乞痴...... 當然運動未完, 後續的發展無人可預料, 但供應不足, 移民不移資產的做法, 的確令香港樓市硬過條鐵。未上樓又有需要的始終是買入資產合適。投資的話, 股票更相宜, 但技巧心志則要更高。

其他野方面, 簡單講一下:
1. 福崗樓: 2個單位都試過換一次租客, 中間都丟空大約4個月, 都算預期之內, 租務市場不算很好, 也不差。淨回報約6厘。樓價升幅大阪好啲, 但租務回報則低啲。大阪及福崗都是有利用價值的區域, 重有一樣係, 想分散中港政治的風險時, 日本突然成為一個很不錯的選擇。嗰時跟著超人向外走的策略, 有一點點un un 腳, 頗為安心的感覺。

2. 虎門樓: Same same as before. 做商人最忌賭單邊, 咁依家強國更強時, 就可以安慰自己好彩有物業在裏面(誤)。暫時內地租金升幅最勁仍然係1線市中心, 1線去到邊郊已好弱。虎門估計一定會受惠通漲, 但租金升幅睇黎唔會好驚人。現時跑內地的感受係, 有一類2線城市其實同1線有得揮, 例如杭州南京絶對非池中物。三線的樓價升好快, 但有沒有下家接貨是一個大問題, 三四線似乎唔多岩我口味。而一線城市租金的升幅以市中心為主, 所以目標應是杭州南京的市中心!?

3. 汽水機: 要讚一讚自己的眼光, 有一部在赤柱的汽水機, EBITDA回報輕鬆達雙位厘數。但智能汽水機已通曬天, 依家要再揾地點落位都好困難, 有啲後悔當時投資如此之少。這也是我要學習的過程, 經常睇岩但賺得少, 捉到鹿唔識脫角。

4. bitcoin: 越來越似會變成黃金一樣的避險貨幣, 認受性在時間拉長下, 只會越來越高。走勢開始跟黃金同步, 在銀紙不值錢的情況下, 我仍認為bitcoin 現價風險不高, 但期待如上年時由6萬一下升到20萬的人, 到底在想什麼... 挖礦持續, 現實中不能挖金礦, 就網上挖下, 當成定息產品也不差。

寫到好累, 充分體現自己投資太散, 管理成本太高的問題, 戒之。

中秋節 - 記小兒成長

昨晚帶小兒落街玩燈籠, 忽然記起佢出世後, 第一次正式出外又係落街玩燈籠...

一貶眼, 2年時間, 從滿臉皺皮到今天牙尖咀利。感謝小兒的到來，我真心的覺得幸福就是抱著他, 拖著他。一家三口, 外邊任他風大雨大, 家裏總有力量。

照顧小孩當然累不堪言, 有時甚至麻煩到壞疑人生:
1. 小兒通常10點睡, 世界盃期間, 10點開波, 心想正正正, 之後突然彈起, 哭鬧到凌晨一點...

2. 明明最初很喜歡吃蛋及菠蘿, 之後所有蛋及菠蘿製品都唔肯食, 一食就吐返出黎, 一地都係....

3. 學識拋波後, 開始拋玩具, 拋書本, 進而拋遙控, 然後刀叉、杯碟... 最近終於將太太用了20年的杯打碎了...

4. 學識爬上窗台後, 不停拍打窗門, 拳打腳踢, 講左十萬次玻璃會爆, 唔識死...

麻煩事太多, 温馨事回想起來好像更多...

最近剛好兩歲要學規矩, 要連續5天早起上學, 真的是大考驗。

第一日放學時, 小兒在好似金魚缸的房內等人接佢, 儍更更, 望到我行過來, 就好用力咁同我揮手, 然後望向老師示意。我拍住片去接佢, 嗰個揮手畫面, 每次睇返, 咀角都不自覺上揚, 金魚佬式甜笑。當日我返工時睇左100次, 同事好大機會以為我睇緊咸片。

N班多菌, 小朋友身體又未完全發展, 返了幾天, 小兒病足一星期。

有一日病到40度, 佢早上起床時, 扁扁咀, 豆大眼淚在面上落下:「爸爸唔好返工啦, 同你玩」。因為小兒未識分你同我, 所以病到咁的小小願望就是「同我玩」...

我從不喜歡小朋友, 到生了小兒後變成愛不釋手。小朋友是可以改變一個人, 一個家庭, 真是神奇。

可以的話, 一定要生小朋友, Last puzzle to make your life complete.

各位, 中秋節快樂, 祝大家人月兩團圓!

亂世中辭職 - Now or Never

今日大家都應該唔想睇我既辭職文。可以的話, 其實我都唔想風大雨大的日子辭職。局勢如此, 但人生路仍然要行。深吸口氣, 繼續前進。

辭職其實已3星期，還要再等多段時間先可離職。內心深處仍然淆底, 巴不得辭職時間再次推遲, 好讓我再享受一下返工的不帶腦工作。

不過, 人生如果只是打工, 我會不甘心。我腦海中的理想工作狀態, 沒有爭取過, 我亦會不甘心。沒有試過盡全力一併, 我更加不甘心。

何況, 這次的辭職, 雖則倉卒, 但亦可說是十年來的計劃。畢業出來, 定下計劃, 5年學習大公司運作及混熟一個行業, 再5年時間考牌, 有自己的小公司, 及有機會飛黎飛去工作。這2個5年計劃一一實現，那之後呢? 一眨眼, 發現畢業時定的藍圖原來已走到盡頭, 然後發現沒有了然後。

用了整整一年的時間沉澱, 亦差點因為母親身體健康的原因擱置計劃，忽然驚覺, 現在不做, 以後都不會有機會!

Now - :
1. 工作上有牌照, 還有體力精力, 有信心找回差不多職位但可能人工減20%的工作。
2. 小孩快2歲, 時間多回了一點, 又未有第二個小孩
3. 太太是強力的臂彎, 只靠佢份糧暫時都夠食。(開始食軟飯生涯 哈哈)
4. 有少量的小生意及被動收入，夠供樓比父母家用, 唔夠養小孩及太太
5. 淨資產達到了原先設定的數字... 再沒有借口不去搏 (唔係炫耀... 香港的資產價格真係痴線)
6. 4大長老還有行動能力, 自己還未需要去每日陪伴他們
7. 工作上真係覺得好濕9...... 如果要繼續濕9 20年, 我寧願.... 寧願失敗左一年後再濕9過...

or Never - :
1. 跟生意拍檔有個想法, 很想去試一下。拍檔已用一年時間打好基礎, 我過去就是幫手執行了! 錯過了這個想法, 我怕沒有下次
2. 打2份工時間真的不夠用，結果是2邊工作都做不好。如果創業不成功, 我會賣掉小生意, 今後20年會乖乖在辦公室裏效力
3. 我現在買不到的樓、車及包包，再打工10年也買不到 (或者根本不敢買)。我現在喜歡吃的食物, 不打工也大約能買到。輸有定數, 而upside no limit, 我認為值得用一生一併。
4. 朱克伯格說過: 他的爸爸是牙醫, 他畢業後不用為創業失敗而承擔家庭的財政責任，他認為這樣的條件本身是一個privilege。我現在這一刻有這個privilege, 我想好好利用。
5. 專業方面, 學得差不多。想有個機會去學第二門學問, 沒有什麼比每天浸淫在新知識裏學得更快。

就這樣。祝福香港之餘也祝福自己。

唐樓仔, 不成功, 便成仁, 立帖為證。

簡記 - 每天要進步的事情

知道要創業後, 安全感大降, 開始不停查找自己不足, 每日進步去改善:

1. 要更集中思考一件事。現在事情太多, 投資, 工作, 創業, 家庭, 有時會未做完一件事就到下件, 美其名為multi-tasking, 實質上逃避難題, 解決方案亦不完美。

2. 要多看書, 準備書單, 每天閱讀半小時也好。有時整本書讀下來, 要點就是3-4句, 但沒有中間的思考過程, 又談何了解該幾句說話? btw, 最近在看我們仨, 當時的留洋讀書人, 有風骨有情趣，不錯看!

3. 體能明顯下降中, 急需運動。上年打波整親腳踝後一直就住就住, 打波水準急跌, 心態問題是一, 體能問題是二, 依家跑步唔夠就黎70歲的外父黎, 情可以堪...

4. 小時父母沒學識但善良, 沒什麼教導就有一句謹記於心: 要時常微笑。長大後事情太多, 人事複雜, 不知不覺笑容越黎越少。縱有多大多難的事, 謹記微笑。

5. 小孩很乖, 但有時頑劣的事情仍不少, 自己脾氣臭, 一開聲就鬧, 需要改變下教育方法。因為很怕慈母/父多敗兒, 有時真的不知是鬧好還是呵護好, 但總歸對現代小孩不能只一味打罵。

5點小事, 切記切記!

痛心疾首 臨表涕零

本想草擬一個理性點的標題，但一想起昨天中環開槍, 暴力驅散等情景, 不禁再次悲從中來。

梳理一下思緒, 紀錄香港6.9-6.12 的黑暗一週:

1. 反送中的修訂, 為什麼香港人不願意通過, 原因很清晰, 就是不信任中國的法制。這點不用任何的hard feeling, 中國領導人一定也明白, 如果不是這原因, 也不用弄一國兩制出來。

在香港從屬中國的前提下，特首及律政司並不會拒絶中央提出的引渡要求，而中間過程亦沒有正常的審訊程序保護(Section 23 cap 503) (邊個咁搞鬼Cap 503, 第廿三條XDXD)。這樣的送中修訂, 直接破壞一國兩制，香港人是不能接受的。

2. 很多反送中的人士, 直接被扣上不愛國不愛港, 甚至是港獨份子的帽子, 實在大錯特錯。就算這10年發生許許多多的抗議遊行等, 要求港獨的, 畢竟是極少數人。反對這條例, 並非不愛國。不要再五毛上身, 一抗議就說那班年輕人不愛國不愛港, 是港獨份子。中間的距離, 實在遠著。

我覺得很大部份的香港人都是愛國愛港的。尤記得北京2008奧運時，大家一齊返家睇劉翔, 開幕閉幕等表演精彩萬份, 心底都是覺得中國終於醒了, 時日過去，中國一定會變得更開放文明。

加上, 很多父母或祖父母一輩都是游水落黎香港，雖然扎根於香港, 心底裏的家鄉, 仍是一個美好的回憶，我們這一代從小在父母片言隻字間, 是明白有幾分跟中國密不可分的DNA。當然90後就沒有這層認知, 但反過來, 90/00後也會回深圳消遣, 飲喜茶, 用淘寶微信，要是中國真的夠強大文明, 90/00後甚至是天然統過80後。

3. 香港人也不是要阻礙中央捉拿逃犯, 在四季酒店內那幾百個內地犯事富商, 大家很歡迎中央去捉拿。我不懂法律，有沒有人有更好的建議, 如何幫中央達到目的, 而香港人也能接受? 這個是政府的責任。那些富商, 動用了國家的錢, 在香港買樓買股票, 根本很多年青人也不歡迎他們, 為什麼不直說這個原因, 而要一直說謊, 以陳同佳案作藉口。如此刻意當民眾是白痴的行為，可能才是最刺激到一眾中產的: 「你當我低 B 架!?」

4. 勇武不能解決問題，在大家也很自豪的健全法制面前, 勇武也很易入罪為暴動, 這在魚蛋革命裏已很清楚。年輕人易受挑釁, 覺得自己條命不重要, 也認為自己什麼都做不到了, 只有揾命去搏, 去買認同。這個事情很可悲，不是被逼到入絶境(或者感覺被逼入絶境)，怎會揾命去搏? 我們作為父母輩一定要清楚告知，你們的命很值, 而且不是錢所能衡量。你未來可能是一個機械人公司的創辦人, 亦可能是國際知名巨星。未來社會是年青人的, 你們要動腦筋, 不要只是揾命搏, 警察也有自己維持法紀的職務，大家立場對立，衝突難免，但流血事件可避則避, 不要讓挑釁者得逞。

5. 雪球中有很多以言入罪的股票案件, 今日信報高生亦再次列出。所以這條例對香港金融中心, 以及金融人士的工作, 是一定有影響的。 我6.9日已經想出文討論反送中這件事，但我怕。近幾年我已經開始自我審查, 我真怕有人會找到我是誰, 然後影響我工作、生意甚至家人。

這樣的自我審查, 在香港不應該存在, 甚至乎, 我覺得對於中央來說, 香港暢所欲言的環境, 對政治的思考甚有Value-added。有什麼比國王的新衣內的小孩說話更有價值，而且內地的民眾基本訊息封鎖, 當權者有著完全的不對稱訊息優勢。上面這段, 應該可以說是幻想了......

6. 香港只是中國的一小部份, 一個沿海小城市, 佔中國GDP 總量只係不到3%, 在不久將來, 除了北上廣深外, 蘇州杭州等2線城市的GDP 總量都會超過香港。但港人不應妄自菲薄，香港的人均GDP 係上海的1倍, 深圳的3倍幾。回歸20年黎, 好多港人上大陸掘真銀, 但同時真的為國家躹躬盡粹(為了錢), 發展經濟。香港人不要看得香港太大, 但亦不宜過於自卑, 覺得樣樣都是中央給予。

容我直言, 內地城市某些發展宜靠攏香港模式, 而非要香港靠攏內地模式, 此乃玉石俱焚的下下策。香港沒有用途時, 應是上海深圳人均GDP高於香港時。到其時, 內地很多城市會比東京更有錢, 消費水平直逼紐約倫敦，香港到時存不存在, 連香港人也不會在乎。但這個階段還未到，在此時扼殺香港, 尤如將一個好老師/好對手殺死, 缺乏競爭下, 只會減慢內地城市的整體發展速度。

7. 事緩則圓。看中央的口吻, 其實不是急於條訂條例。好打得的香港老母, 如果能不逞一時之氣, 緩一緩, 諗一諗, 事情是有轉寰餘地的。否則, 香港人今次好清晰, 不撤回條例, 寸步不讓, 暑假前的立法會會議, 一個都開不了。「北京政府遞奪自由」, 如此頭條, 日日上各國際報章頭條, 中國外交部日日比人問, 最慘原意並非如此。如此後果, 一個小小的特首, 真的承擔得了?

痛心香港, 希望此地福大, 大步跨過。