人生交叉點

最近收到公司bonus, 金額黎講, 都算唔錯, 刷新左個人紀錄, 年尾應該會有另一筆bonus 更大，不過，我唔算太開心，平常心之餘，反而有點七上八落。

尋日同個即將離職同事食飯，佢會離開財務行業轉戰虛擬貨幣買賣平台，幾意外啲虛擬野竟然有支咁大水喉可以請得起呢個同事，重要係buy out 3個月......不過，聽落就好正，但呢位同事29歲仔，就黎結婚，搏到盡，轉份高風險既工，咪又係加嗰20%人工。香港地，幾千銀，佢自己都話，唔知對改善生活有幾多幫助，不過都要搏下。

前排同個內地做cake 做面包生意既客食飯，佢03年開始創業，到今日個餅店集團營業額係有1.5億...人仔... 不禁小左一聲出黎, 一路以為佢啲爛鬼餅店最多咪廿幾三十萬生意額一個月，開左10間8間咪比盡4千萬一年，net profit margin 15% 同埋你持股得51% 咪得3百萬一年落袋。你老闆, 1.5億.......... 我個個月袋呢個新紀錄既bonus, 一世都無可能有呢個成就。

再之前又到報稅時間，基本上香港中慘就係年薪到某個位，之後啲錢都係有17%比左政府... 尤如倒錢入海。細個時阿媽教落交稅係應份, 係開心事，呢個大道理係岩的，但當好多人揾得愈多, 交既%愈細時，心理真係好唔平衡。而交左啲稅去左邊??? 黑人問號...

幾件事加埋, 愈黎愈令我想唔打工出黎創業。人到中坑，究竟係咪值得冒呢個風險，放棄都算唔錯既工作，走去創業。但唔去咁做，我已經可以睇到自己既極限。

不過幾年做小生意既經驗係，創業難過打工100倍，中間困身，煩惱可以多到嘔。湊住個B，我有冇能力去做?

好。難。決。定。

世界盃 2 - 轉棒4強最「弱」的克羅地亞

克羅地亞今年的賽事我全部看了，甚有黑馬本色。

中場摩廸，大熟大勇。沙維退休後，最強既中場指揮官其實係佢。為人低調，外表平實，但腳下功夫同閱讀球賽能力真係不得了。睇佢踼波，幾下控球同傳送就梳理好克軍中場，真係超曬班。皇馬呢幾年係靠佢稱霸歐洲，多過C朗。

拉傑廸，摩廸身旁最好拍檔。佢型仔過摩廸好多，跑動範圍大，大心臟，可以校炮，比直線或遠射，重有少少帶波推進能力，非常全面。喺巴塞其實佢係小數接近打足全部賽事既球員，可見其重要性。

仲有個國米波素域，大家可能聽都未聽過，但佢每場既活動範圍超大，解放左拉傑廸同摩廸既防守任務，佢就好似巴西既卡斯米路咁，無左佢中後場運轉會有好大問題。

前場文素基治+列比鍚，實而不華。31歲文素基治喺祖記可以站穩陣腳，列比鍚就今年狀態顛峰，2個月前曾喺盃賽2球射爆拜仁。

後防差左啲, 洛夫雲有睇英超都知咩料...... 英格蘭1-2下突擊有機會刺穿防線。

唔係講笑，我覺得決賽係克羅地亞對比利時，今年會有第9個國家拎到世界盃!

世界盃 1 - 一代新人送舊人

既然股市準備入熊無咩好做，一於集中精神睇世界盃!

阿根廷同西班牙16強出局，西班牙差左個美斯，阿根廷差左個西班牙系統。2者結合先係巴塞既Tiki taka，缺一不可。

西班牙中場非常流暢，傳波行雲流水，但差一個靈光一閃既突破點。往往傳到禁區邊就不知所措，連帶哥斯達都無咩威脅。美斯就算31歲，單單處理禁區邊既突破或分波或埋門仍係頂級，體力上亦不用負荷咁大。

阿根廷就真係一個笑話，條防線差過日本，條中場線工兵居多，毫無活力。阿根廷要梳理既係中後場，如果有西班牙呢條中場線，配合前線既阿古路美斯等，你話幾咁美好，可惜沒有如果。

阿根廷將美斯推到中場，前線繼續有幾個神鋒，最正路，但亦最唔合理。美斯係神到打攻中都得(A級)，但佢最大威脅係三閘線(S級)。田忌賽馬，你揾自己S級既前鋒去中場硬碰人地A級中場，無著數......但阿根廷根本無選擇，其他中場係B級...... 連組織個波上前場都做唔到。

14年仲有拿維斯，柏斯托尼等，今屆有誰...? 現代足球講既出擊型閘衛如馬些路，無，中場節拍機如卻奧斯，無，推進型中場如香村真司，無，擎天一柱中堅如耶利米拿，都無。其實講咩世界盃，入到決賽週算係咁了......個人認為呢隊阿根廷連小組出局的塞內加爾/南韓/塞爾維亞甚至伊朗都嬴唔到。唔好唔記得，世盃前友賽西班牙，阿軍慘負1:6...

弱隊對強隊都會有針對性部署，而且通常做得好好，但呢隊藍白球衣，好似第一次睇法國踢波咁。麥巴比中路快放，完全無諗過點防守，而且3-4球都係咁，明顯零戰術。被技術性擊倒，又能怪誰?

現代足球講既係成個國家既足球文化同系統，觀乎阿根廷足總既混亂，國內傳媒既潑冷水，青年梯隊打法的不統一，呢隊南美勁旅相信要踏入長達數年既黑暗期。再見了，美斯!

愈寫愈多，下篇再續 XD