股票投資方式寫兩句

今年的投資理念跟以往有所不同。

大注, 如超過組合5%的, 專注於收息股。但收息股中如果係低息但成長性肯定的, 我接受程度高左好多。

中注, 佔組合3-5%的，有時間限制的, 專注於事件驅動股。呢類型股最麻煩係比時間磨死, 所以需要精心挑選，緊貼通告。事件驅動型又分小勝例如幾個月幾個%, 或有機會1年賺成倍的，要小心分配注碼。

小注, 1-3%的, 睇技術走勢, 順勢而為, 食到應其實好和味, 精挑3-4隻, 太多自己處理不到。
試注, 0.5%左右, 作為觀察倉, 比較彈性大, 勢不順就斬, 勢順會加。

2017年回顧

2017年所有計劃其實都因為小兒來臨而有所調整，不過大方向都不變。藍色為達標，綠色為達一半，橙色為需要注意，紅色為唔掂!

原本的計劃︰

1. 將不太賺錢的其中一盤教育小生意賣盤。 --> 年中時終於順利賣盤，投入的時間心力跟回報不成正比，賣盤令自己多了時間做幾他事情，非常好!

2. 維持另一小生意的日常運作，穩建過渡。-->成績還好，雖因為要迎接新生命而減少時間投入，但畢竟已運作了3年，有頗為穩定的收入，很欣慰。

3. 適應新工作環境並希望做出點成績。-->經常北上，其實很累，但叫做見識多左，熟悉多左大陸既市場，不過內地政策偏緊，港企影響力減弱等因素，很難做出成績。開始要思考放棄打工條路。

4. 股票被動收入達到每年10萬元 -->達標的，其實仍有現金在手可以增加股息回報。下年希望達到12萬咁上下，每月穩定有1皮幫補下。

5. 計劃換大一點房子準備生小朋友 -->由2016年開始一直做唔到呢點!! 其實2016年年中有很好的買入點但因為開展教育小生意而錯過了，後悔至今。年尾買入虎門單位，叫做呢個目標既變奏版。換大點房子呢點太多野可講，另文詳述。

6. 多做運動，保持健康身體 -->年中還可以，小兒誕生後運動量劇減，需要正視呢個問題。

7. 對家人朋友好，享受親情友誼 -->應該還可以的, 人大了, 愈來愈著緊身邊既人。

8. 後加: 希望母子平安，順利誕下小生命。-->順利的, 小兒出生後亦健健康康，頗為可愛，雖然辛苦太太受生產之苦，照顧小孩又用很多時間，私院陪月滿月宴BB用品洗費亦大，但我竟然都覺得非常值得，小生命真係好神奇，改變左我好多觀點。

買入虎門單位

一年一項小投資今年的目標定了在虎門住宅單位。由年中一直物色單位到前幾天，終於狠下決心扑鎚買入。大約1球野，計入雜費，回報3%。

短線睇 (1-2年)
內地住宅我自己睇2.5%回報都算差不多了。如果以呢個租金，2.5%回報賣出都值120萬港紙。所以虎門樓有點低水，比較安全。

下年年尾高鐵香港段開通，九龍站到虎門的車程約為35分鐘，算上的士到我單位，大約50分鐘車程，單程車費大約HK$200。

來回HK$400, 算啦, 唔通你以為真係住虎門, 返工返ICC咩? 所以高鐵對虎門黎講宣傳價值多於增值用途。

不過高鐵開通左，對偏遠地區黎講，會鼓勵旅遊，唔見得光既野等非日常活動，所以租金始終會有支持。

中線睇 (3-5年)
再看看虎門與深圳，高鐵+的士車程35分鐘，來回大約HK$120。揸車大約60分鐘，來回油錢大約HK$90。兩種方式，每月20日差不多成HK$2000交通費。

如果深圳樓的租金比虎門貴HK$3000，邊緣深圳人開始會有誘因住虎門，到深圳上班。每捱一個月就慳$1000。

我買的單位租RMB2000，在深圳同大小的單位大約RMB3-4000，現時未有足夠條件觸發劇情。

深圳人工平均RMB6000，租金由RMB1500起錶。再過5年人工應會達至RMB9500 (即等同或好於香港)。租金佔人工大約25%來計，到時深圳租金會由RMB2500起錶。同類型單位我估會好接近RMB5-6000水平。

即5年後，要在深圳拿一張入場券，虎門是一個居住選擇。

3%的回報應無走雞，問題只是到時深圳人入場後樓價可升多少，虎門住宅供應其實不多，一下子住爆，租金拉升到RMB3000的話，單位就值HK1.6M了。升幅打個6折，計埋租金，5年50%回報，合理。

當然，中山、長安等地是競爭對手。中山住得舒服，長安路程較近。但2者我暫時未找到有3%回報的目標物，水位不足以令我買得舒服。

長遠睇
賭國運，講真日日都望強國爆炸但仍然未爆, 如果我呢筆投資可令強國踏入調整，從而令香港有一刻喘息機會，我好開心作出呢筆投資，到時就買返香港樓。所以呢類投資切忌無後著。

我覺得以10年8載角度去睇，喺北上廣深擁有投資係整個組合不能缺少的。

借香港錢
老老實實，加息週期就一定啦，趁水尾借到幾年平錢的話，首付及風險實在不大。

附上景觀一張，向北，不算太好座向，不過個個業主都封盤等高鐵及大灣區規劃，選擇不多了!

牛3 未完

恒指衝上30,000, 街邊全是講股人，但我傾向牛3仍未完結，23號的回調雖然強烈，但令市況健康一點。

之前反而怕如果恒指繼續上衝, 死得更快，依家借A股大跌調整一下，未嘗不好。

這次的牛3之後仍然會是地獄，大家在牛3賺錢爽快時，其實就在刀口舔蜜一樣，一切小心，唔好到最後為左少少蜜餞，連條脷都無埋。

個人操作, 收息倉大部份不變，但
1. 減持了滙豐，因為息率跌到5%, 收息來說不算吸引，而恒指亦不似突然可爆多5000點。
2. 減持了一點1098，因為內房休息，而今年1098升了一倍, 食少少，同時其息率比610低。幾個月前已開始搬過去610
3. 增持了點太古B，有生之年可以8年最低位買到太古，我會繼續買入。如果跌到$8十年最低位，我會全副身家掃。國泰重有得差嗎? 2年後一條好漢!
4. 收集了一點正大，之前的利潤唔想輸返，入啲大折讓唔識郁股坐下。零壓力。
5. A股收網鎖定部份利潤, 最大持股仍是平保, 第二位由恒瑞變成享通, 萬科仍喺第三位
6. 準備抬錢買樓, 鎖定利潤, 完成後再報告比大家聽

牛3未完，但就好似調戲一個索到爆泰國人妖，樣同身型翻版林志玲咁，摸到裙擺，好諗定幾時收手啦，到時走唔切呀！

人妖都摸? 妖, 除之前鬼知咩?
熊市都玩? 小, 爆之前鬼知咩?

大家一直看不起的強國

說起強國，很多香港人見解仍然局限於強國人打尖，蹲地，吐痰，不講理，拖著貨車般的行李喼....下刪100個奇怪行為。

因為工作需要，有時會游走於北上廣深。我在工作層面看到的強國70-90後，實在不能跟在香港見到的相提並論。

他們很多飽讀歷史，斯文有禮，坦承中國的不足，努力學習香港優勢，甚至經常到訪外國，去的地方比你我都多。

只能說，現在來香港，隨街蹲著抽煙的，很多是內地中下階層的人。他們剛有了點積蓄，最易去，而又一直想去的地方就是香港。

內地中上階層的 (不好意思整篇文章有著階級的色彩)，他們努力工作到7-8點，夜晚應酬，週末有時還會讀點工作相關的書藉。懂基本英語，邏輯思維很強，亦有著一定要解決問題的決心。

不要看他們經常飲飲食食，這層關係網說穿了，在香港的banker律師地產商難道不用摸著杯底happy hour埋堆嗎?

所以，就算你怎樣不喜歡習大大的新時代中國特色社會主義思想，怎樣不滿香港政治現狀，現實狀況就是你要跟這些強國中上階層的強人們競爭。

以為在尖咀海旁蹲著露出肉色底橫的大媽就是強國代表? 真正的強國正選，男的在華爾街或矽谷搞收購，女的在英倫街頭一邊讀Wuthering Heights，一邊在wechat 招呼著幾個裙下之臣。

準備好這個充滿競爭的時代了嗎?

重啟網誌

原來上一篇網誌, 已經是5年前寫的。看到之前寫的文章, 真感覺光陰似箭。回望這5年, 實在成長及成熟了不少，很多以為自己做不了的事情, 都做到了, 或至少叫踏出了第一步。

我想在這網誌分享自己生活、投資、生意及工作的一點一滴，給自己一個以後回味的機會。

先做一個簡單介紹, 我是一個Slash (哈哈, 終於用到呢個潮term)

我是一個打工仔/小生意老闆/Trader/中介, 希望隨日子過去, 我可以做到更多自己鐘意既事, 擁有更多職稱，更多自由。

打工仔 - 朝9晚6, 搭車用左2個鐘, 開始思考應否繼續呢種生活
小生意老闆 - 有啲失敗賣盤, 有啲成功賺到啲, 每樣都會令自己學習並變得更強
Trader - 其實就係股票散戶, 不過有個名型仔啲咁解
中介 - 只做較大額Deal, 可以忽略，但因為亦係自己鐘意既範疇, 先加入到Slash 中

世界那麼大，點解要限制自己?